加盟環球發放正能量 梁詠琪性感封印唔再做公主

歌手梁詠琪（GiGi）昨日於尖沙咀舉行《環球歷險記》記者招待會，正式加盟環球唱片。身穿粉藍色斜肩Bling Bling連身裙的她，擔任「說書人」為活動打開序幕，並趁機宣布推出新歌《再見灰姑娘》。

「新人」切蛋糕永結同心

她坦言加入環球大家庭緣於去年合作一首陳百強的紀念歌，彼此在宣傳、音樂計劃上很啱Key：「我有10年冇簽唱片公司，一直都係自己做好攰，想搵團隊幫手。」環球唱片董事總經理黃劍濤（Duncan）隨即上台跟她進行簽約儀式，又送上故事書及巨型蛋糕為加盟禮物，但切蛋糕時他倆猶如一對「新人」，主持人不禁笑言：「恭喜晒！祝一對『新人』喺音樂路上永結同心。」笑爆全場！GiGi見「新郎」一臉尷尬，忍不住笑說：「畀紙巾Duncan抹汗，我真係好似打開人生新一頁咁！」

梁詠琪加盟環球，昨日舉行盛大記者會。	一對「新人」齊齊切蛋糕！	黃劍濤上台跟GiGi進行簽約儀式。

GiGi受訪時表示以「灰姑娘」造型現身，笑言女兒看見她的裙已雙眼發光大讚靚：「我拒絕再做公主，所以先會有新歌《再見灰姑娘》，唔再做慘情歌主角，希望以童話故事做藍本，以成人嘅角度講故事，帶畀大家正能量、溫暖同希望。（Sofia有聽新歌？）佢話好聽，小朋友講嘢好真，佢一聽就話認得媽媽把聲。」今次她跟環球簽約3年，包括一張專輯及十首廣東歌：「簽公司係因為想有佢哋幫手兼顧幕後同宣傳，以前自己工作室搞好煩，有大團隊就煩少啲，自己可以多番啲時間。」

梁詠琪一家三口甚為幸福。	梁詠琪為女兒着想，要半裸「國王」穿上透明雨褸。	郭偉亮（右）與監製舒文（左）齊齊為梁詠琪撐場。

半裸男模暫代老公

儀式上找來半裸外籍男模扮演國王，暫時頂替老公Sergio身份，問到哪個「老公」較靚仔？她打趣說：「Model大隻啲，靚冇得比。（唔搵正牌老公？）因為指定要唔着衫，老公唔夠Fit就搵Model解決。（孤寒唔想晒老公？）係錫住佢，唔使佢特登操練。」因考慮到囡囡有機會見到合照，最終決定讓男模穿上透明雨褸，她更揚言會為愛女收起性感：「往後所發表嘅歌曲、電影主題都會過濾，唔好畀佢覺得媽媽有雙重標準，會有混淆，所以啲太大膽嘅嘢都唔會做。」

郭偉亮為GiGi監製分外肉緊

與GiGi合作無間的音樂人郭偉亮（Eric Kwok），與監製舒文聯手為她製作加盟歌《再見灰姑娘》，雙監製昨日齊齊出席GiGi的簽約儀式。二人甫上台，GiGi笑言未曾試過錄一首歌長達5日，又指他倆都沒有脾氣，特意跟他們合作，舒文趁機「投訴」她：「啱啱VO把聲係咪你？你錄音嗰時冇童話聲音。」令她爆笑！

之後GiGi跟Eric互笠高帽，互讚是對方的伯樂，她說：「好耐之前我哋就合作，佢喺音樂上畀咗好多啟發同自由度我。」Eric 則大讚GiGi好神奇，把聲完全冇變：「依家仲靚得啱啱好，以前太瘦，我幫靚女錄音係肉緊啲。」