簡淑兒膽生毛飛車減壓
剛回復自由身的「宅男女神」簡淑兒（Jessica），日前現身九龍城一個小型賽車場，即時女神變車神，戴上頭盔極速飛馳，無論衝前或高速掟彎飄移都冇難度！她笑言人不可以貌相，最喜愛速度感︰「好多人話我鍾意玩嗰啲同我個樣唔襯，好似賽車、潛水、滑雪，鍾意啲比較危險嘅活動，只要一投入去玩，就好似去咗第二個世界咁，釋放壓力好治愈。」而她首次接觸賽車是因為家姐︰「3、4年前家姐帶我去比賽，贏咗冠軍，覺得好爽！我鍾意玩嘅活動都有個共通點，就係唔使講嘢。我講嘢唔係好叻，坐上架車度淨係望住條路一直去，唔理身邊有咩參加者。」
瞞家人考電單車
問家人會否反對，她大笑自爆反叛史︰「佢哋唔知，知道咗都可能擔心。記得有次我拎住頭盔返屋企，媽咪問我做咩學電單車，但其實嗰時我已經考到牌，不過考完都冇揸過，驚買咗架車會不停揸，又要搵位泊車。」
Jessica的大膽性格，是在外國讀書時訓練出來，她說︰「人一世物一世，乜都要試吓。香港會覺得女仔應該斯文、比較公主，但嗰邊做呢啲嘢就比較普遍。」問會否希望將來的男友有共同興趣？她打趣指身邊的異性朋友反而勸她放棄︰「可能佢哋想保護我，不過呢啲興趣好個人，或者可以一齊去發掘新嘅興趣，有伴都會開心啲。」
