去年憑《我的超豪男友》（Crazy Rich Asians）極速上位的美籍華裔女星吳恬敏（Constance Wu），上周疑因不滿成名劇集《初來報到》（Fresh Off the Boat）宣布添食阻礙她拍戲搵真銀，在社交網爆粗以示不滿，日前又被美國傳媒踢爆她任由寵物兔四處便溺！
據知吳恬敏最近在紐約Chelsea區拍攝新片《Hustlers》，並在當地一棟住宅大廈租住閣樓單位。負責打掃的清潔工向屋主「報寸」，直指滿屋都是兔屎，屋主因此威脅要趕走她！有知情者表示：「Constance嘅兔仔完全破壞間屋，周圍都係兔仔屎尿，而佢完全唔清理，隻動物喺睡房、廚房同客廳四圍走。間屋臭到癲，令人作嘔，隻兔仔喺床上大便，而佢仍然同隻兔同床！」