菊梓喬餓底食住雞煲開騷

入行3年的Hana年初升呢成為「最受歡迎女歌星」，昨日宣布將於8月24及25日假九展舉行「hana菊梓喬只想與你在一起演唱會」，一身紅裙打扮的她像新娘般現身記者會，並進行頒發《忘記我自己》及《但願人長久》兩張唱片，分別獲白金及金唱片儀式，三喜臨門，唱片公司老闆何哲圖等和她飲香檳慶祝。

皮包骨唔騷身材

Hana形容開騷是夢想成真，有指此檔期本屬胡鴻鈞（Hubert），傳他因太囂張被「雪藏」才由她頂上，對此Hana否認：「其實年初都有呢個計劃，只係就個唱導演同監製先落實呢個期，Hubert邊有『雪』，佢好忙，日日拍劇o架！（請佢做嘉賓？）我都想，唔知佢得唔得閒嚟。」她亦想請容祖兒及曾傳緋聞的張景淳，但強調跟張景淳只是同村又是認識很久的好朋友，更愛屋及烏想請與他同劇的《愛．回家》演員睇騷。

目前距開騷只有三個月時間，她說：「知道開騷時都覺得係咪有啲冒險，因為開兩場，但呢啲都係公司決定。」她表示可以做的就是練體能：「唱三、四首歌就肚餓，公司幫我特別安排，等我換衫時，台底有嘢飲食，唔知台上擺個雞煲得唔得？我表演食嘢。」問她可會性感演出？她說有料不怕露，可惜她沒身材：「全身得啲皮同骨，我會努力增肥。」

避忌講母女和解

對於有指曾遺棄她的菊母得知妹妹患病而回家，與Hana重拾母女情，Hana表現避忌：「我同媽媽一向好好，我好愛佢，妹妺只係患感冒。（傳父母各自再婚？）唔知，呢啲私人嘢唔講啦，總之大家都開心生活。」