馮盈盈街市死𦧲講價平得4毫子

營養學畢業的馮盈盈，對食物也相當講究，加上平日勤做運動，身上可謂沒有半點多餘脂肪，為令更多人食得健康，她便親身上陣，以背心露腰裝、一副戰鬥格率領兩個粉絲由街市走到廚房，共同努力製作既簡單又健康的無麵粉Pancake。

出動粉絲幫口

攞住一百蚊港幣的她，甫開始已喋喋不休表示要買雞蛋及香蕉，未幾一支箭殺入雜貨店，眼利的她已(目及)到擺放雞蛋位置，當店員表示雞蛋售價為1.4元一隻，她即嗲聲說：「我想買6隻，可唔可以齊頭收8蚊呀？」沒料男店員未有憐香惜玉「彈鐘」，並以老闆在場為由拒絕減價，不過盈盈仍死纏爛打繼續出口術，在旁粉絲也加入戰團幫口，最終男店員難抵盈盈嗲功，收平4毫子打發眾人，但已令盈盈心花怒放。

及後盈盈再以同一招數向生果店老闆娘施計：「18蚊呀？我係2016年港姐冠軍，可唔可以收平2蚊呀？」老闆娘望一望盈盈即秒回：「冇得平，你個樣夠18歲卜卜脆啦！」講價失敗的她惟有扁晒嘴，乖乖畀錢走人。

殺入雜貨店買嘢，盈盈出力講價。	去生果店買蕉，遭老闆娘秒殺。	落足眼力揀雞蛋。

失手煎燶Pancake

雖然講價失敗，但盈盈很快收拾心情，與粉絲浩浩蕩蕩返到廚房準備食材，並分配工作，一切準備就緒後，盈盈把材料混合，繼而進行最重要的煎Pancake環節，惟第一塊已失手煎燶，她忍不住大笑，更以未熟悉火候作為失敗藉口。及後即戰戰兢兢把第二塊Pancake漿落鑊，於粉絲不斷「加油」口號打氣下，盈盈終於成功煎出靚Pancake，大抵眾人士氣高昂，盈盈興奮得玩埋拋鑊，更忽發奇想學謝霆鋒揈香蕉剝皮，以製作玫瑰花伴碟，不過正當完成之際，得意忘形的她卻不慎被利刀(界刂)傷拇指，呱呱大叫，並即以清水沖洗及處理傷口，為怕粉絲擔心，她即安撫他們說：「真係玩到見紅，不過我冇事，放心。」及後齊齊大合照留念。

手起刀落切蕉卻(界刂)傷手，盈盈扁晒嘴！

盈盈煎Pancake，粉絲Freeman（左）及阿彭睇到拍晒手掌！

談到粉絲表現，盈盈不斷讚好：「兩個都好幫到我手，其實我都有了解呢兩位粉絲，知道阿彭曾經有病，養病期間睇我啲節目，我都好開心帶到正能量畀佢。而Freeman呢，知佢想我教減肥，我都有醒佢兩招。」