Mr.嫌錢腥 夾Band尋自我
樂隊Mr.前晚開騷，分享多年來高低起跌。結他手Ronny憶述11年前獲唱片公司招手，甘願以樂隊唱片換取買跑車的夢想；MJ則指樂隊令他尋回自己；主音布志綸（Alan）為手握控制權，揚言暫時不會簽新公司。
樂隊Mr.前晚於紅館舉行10周年演唱會，吸引劉美君、沈震軒、鄧月平、張耀揚、許廷鏗及少爺占等捧場，而張繼聰、太太謝安琪偕囝囝張瞻睇騷，見謝安琪睇騷時High到震，在台下不停手舞足蹈勁投入！至於主音Alan老婆與兒子則坐在觀眾席欣賞演出。
為出碟棄揸辣跑
五子於演唱會中段分別說出心底話，Alan說：「呢個rundown完全自high，呢10年Mr.做過好多演唱會，好想將我哋嘅經歷放番喺演唱會，所以好多高低起跌。」結他手Ronny憶述11年前，有唱片公司向他們招手：「當時諗40歲嘅時候，想要一架跑車定一張樂隊嘅CD呢？我終於選擇咗一張樂隊嘅CD。今日我已經過咗30歲零百幾日，真係買唔起一架跑車，但我哋出咗11張樂隊嘅CD，可以放喺朋友跑車上播放。」之後Dash多謝好友張繼聰、謝安琪及陳偉霆一直支持，主音結他手MJ則指Mr.讓他尋回自己：「如果畀一千次機會我，我都會繼續做多一千次，行多一千次呢條路。」
拒簽新公司
慶功宴上，Mr.表示雖然已離開公司，不過仍獲很多前輩愛錫：「譚詠麟騷前專登約我哋食飯打氣，陳奕迅（Eason）就低調入場睇，睇完畀咗好多意見我哋，仲話睇到眼濕濕。」問到會否再簽公司？Alan表示不會，覺得大家會否繼續夾Band才是重點，不簽約才有控制權。至於受腰患困擾的鼓手Tom表示演出未受影響：「喺台上係唔會覺得痛，但完騷後手同埋背脊好痛，今次係入行10年騷，唔想後悔，更加唔可以留手。」