李焯寧精神分裂要還神
有「金牌丫鬟」之稱的藝人李焯寧（Karen）最近變身社團大家姐，跟吳卓羲、黃宗澤、關智斌及吳千語合拍內地超級網劇，造型全以露肩騷鎖骨上陣，霸氣得來不失性感。她透露為以最佳狀態示人，現積極減肥，戒糖及澱粉質，又大讚劇組窩心，為她安排特別餐：「佢哋會喺我個飯盒上面寫明『李焯寧，勿動』，真係好感激佢哋咁細心。」
Karen表示除該網劇外，同時接拍ViuTV一部時裝劇及內地的古裝劇，將會三劇同時開工，笑言演到有點精神分裂：「好在三套劇嘅角色都好唔同，ViuTV係做辦公室嘅上班族，而古裝劇就飾演娘娘。」她稱煞科後，計劃8月去日本旅行兼還神：「我去年去咗東京一個神社參拜，當地好多知名藝人都會去，話可以有助演藝運，今年真係劇接劇，所以諗住去還神。」
