湛琪清蜜月落重本瞓醒玩跳海
汪詩詩表妹湛琪清（Jessica）早前與丈夫金承威（Kenneth）到馬爾代夫度蜜月，她笑言原本計劃輕鬆度假，但老公精心安排了許多水上活動，例如潛水、浮潛、水上滑翔傘等，度過浪漫又令人難忘的蜜月，更大讚老公抵錫！
Jessica坦言此行花費不菲，因為入住價錢昂貴的Water Villa：「屋外就係海，一起身就可以跳落海游水。我都係第一次住，雖然價錢唔平，但老公話唔緊要，因為係度蜜月，唔介意花多少少錢。我哋又租船出海，見到好多海洋生物，好似大海龜、鯊魚BB、海豚等，真係好值得。」
老公影靚相
雖然每天都要做大量水上活動，但她依然增磅而回：「因為我哋每餐都食得好飽，我怕着泳衣唔好睇，所以到旅行中段，我哋決定唔好食咁多，不過見到有特別主題嘅自助餐，又忍唔住去試，所以就肥咗又黑咗咁返嚟！」Kenneth在今次行程化身攝影師，為太太操刀拍攝不少靚相，Jessica笑言：「大家唔知佢影相好叻，所以見到啲相都好驚訝，我覺得有個識影相嘅老公都好好。」
未慣做人妻
問到兩人有否積極造人？她坦言：「冇諗住咁快有BB，因為想過二人世界先。（習慣做金太未？）第一個月真係唔係好慣，尤其要叫老爺、奶奶。我哋嘅新居裝修緊，依家喺老爺、奶奶屋企住，佢哋好好，當正我係佢個女，大家相處得好開心，我好好彩。」