袁偉豪預告雙喜臨門
藝人袁偉豪（Ben）與女友張寶兒拍拖以來感情穩定，不時被追問婚期，前晚Ben出席活動時講到結婚，他稱有很多可能性，更揚言不排除到時會雙喜臨門，同時榮升人夫兼人父。
袁偉豪與李佳芯（Ali）前晚化身新人為婚宴場地「譽宴·星海薈」開幕擔任嘉賓，兩人由旋轉樓梯走下來，恍如預演婚禮，Ali笑言：「好在我冇着白色裙，否則會畀人誤會我結婚。」而身穿黑色禮服的Ben開玩笑指似拖着出嫁的女兒。
婚禮最緊要盡興
談到夢想婚禮，Ben坦言最重要是讓朋友玩得盡興及長輩開心，問是否想大搞？他說：「冇人知，睇心情。」至於與女友張寶兒可有傾過結婚？他坦言：「有傾過，都有諗過吓，都係順住去，反正依家話想結婚都要一年後，除非乜儀式都唔搞。」再問會否靜靜雞註冊？他語出驚人：「真係唔知，有好多可能性，可能到時雙喜臨門。」
拍拖四年再觀察
至於Ali稱只有劇接劇的雙喜臨門，Ben反指Ali已奪視后，是時候做人妻，但Ali認為最重要是搵啱對象，又稱拍拖跟結婚是兩回事。問她是否暗示男友陳炳銓並非結婚對象？她即瞪大雙眼，連說三次：「唔係！」續解釋：「我係咪講錯嘢？我係話有時好男友未必係好老公同好爸爸，要睇落去先知，但如果佢唔好，我哋都唔會拍拖四年。我哋都想行去下一步，但要睇緣分。（差啲咩？）時間同錢。」
