何廣沛為朱晨麗操股露全相

何廣沛同朱朱肉帛相見，今次有好戲睇！

無綫藝員何廣沛、吳業坤、朱晨麗及龔嘉欣等，昨日在將軍澳電視城開工拍攝劇集《大醬園》。何廣沛笑說劇中有一幕講述他與朱晨麗在溪邊肉帛相見：「劇情講我哋一個喺度游水，一個喺度沖涼，未知導演點拍，都係第一次拍咁性感嘅場面，可能要全裸o架！如果全裸就要露股，等我得閒操吓臀部先，哈哈！」

朱朱點評拍檔身形

為了應付劇中騷肌場面，何廣沛笑言與吳業坤不時在雜物房操肌：「有時要着雞翼袖或者騷上半身，我哋喺雜物房互相泵脹少少、泵硬啲……肌肉先拍！（朱晨麗有咩評價？）佢對吳業坤身形評價多啲，佢弗啲收晒水，我就冇時間操。」

坤坤拉開衣領晒心口，龔嘉欣望實唔眨眼！	龔嘉欣頻頻換造型，熱到狂標汗。	成班壯丁傍住，身子較虛的龔嘉欣唔愁冇人照顧。

龔嘉欣作嘔作悶

至於龔嘉欣指劇中有三個造型，最辛苦是天氣酷熱，而一日要轉三次妝，笑說：「要噴好多噴髮膠，所以個頭都好膠！」並指日前到南生圍拍攝一場躺在濕地扮死的戲份，耳邊的血漿變成一條蟻路，最怕螞蟻爬入耳仔，又笑說：「因為耳水不平衡個人好攰，坐長途車會頭暈，容易流汗，又作嘔作悶，所以畀吳業坤笑我係咪有咗！（『經手人』係吳業坤？）我好傳統，會結婚先生BB。」此外，她透露不用開工的日子會到陳凱琳家中探BB：「我成日捉住佢隻手嚟錫，Grace又會傳啲BB相畀我睇，自己有啲變態戀B，仲要戀人個B！」