許靖韻避談分手：遲婚冇所謂
歌手許靖韻昨日現身電台宣傳最新情歌《原來我們都一樣》，講述愛情是一個循環，她坦言對歌詞好有共鳴，全都是自己的拍拖經歷，問到是否跟男友容穎賢的回憶？她突然煞有介事，尷尬說：「依家做嘢為主。（分咗手？）工作為主，其他嘢唔諗住，媽咪都唔急，佢話遲婚都冇所謂。」疑戀情生變。
講到日前生日，她開心表示第一次與粉絲慶祝：「正日喺香港，第二日返咗北京出席活動，有粉絲送蛋糕畀我，又買咗港鐵燈箱，仲知我鍾意飲珍珠奶茶，印咗我個樣落啲杯度！（有咩生日願望？）希望可以喺香港開售票演唱會。」她表示之後分別於台灣、上海舉行小型音樂會，然後預計下個月推出EP。