鄧麗欣母女檔派花送驚喜撻Q

鄧麗欣(Stephy)昨日趁母親節化身「街頭愛神」,攜同媽媽參與慈善團體的街頭派花活動,首次「母女檔」行善,別具意義,她說:「今日好特別,媽媽以偉大母親嘅身份去派花畀其他偉大嘅母親,係一個好難忘、開心嘅母親節。」兩母女一早到辦公室為過百支康乃馨裝飾扮靚,送花之餘,同時要令子女向媽媽當眾送吻,將愛意傳遞開去,吸引大批途人圍觀及集郵,期間Stephy胞姊更驚喜現身,一家三口拍照留念。

活動後,Stephy帶媽媽吃大餐慶祝,她笑說:「我比較怕醜,遺傳咗媽咪口密嘅基因,好少喺佢面前講肉麻嘢,在心中啦!不過媽咪好鍾意收花,佢好少女心,所以我準備咗紮花送畀佢,畀個驚喜佢!」豈料因為人太多,姐姐先行接走母親,令她送花驚喜「撻Q」,她笑說:「我要再搵個時機畀驚喜佢。」