祖兒乜場都唔加﹕依家唔係鐵人

祖兒希望保持最佳狀態，拒絕將休息日改為加場。

將月8月舉行個唱的祖兒，昨日現身護膚品牌活動時，開心宣布18場演唱會的門票前日公開發售，一日內已火速售罄，對佳績大感鼓舞及感動，但透露公司同事怨聲載道：「佢哋收到通知，每人只可以內部認購五張飛，我都有安慰佢哋。」

中場抖抖Keep最佳狀態

祖兒指有同事建議她加開日場，但一口拒絕：「我啲騷好似做咕哩咁，一日兩場搞唔掂。（你中間有兩日休息，唔好休息做多兩場？）我唔會Cut咗我嘅休息日，雖然開多兩場，可以有多兩萬觀眾睇到，但如果我中間冇得休息，後面場次嘅觀眾睇到嘅我就唔係最佳狀態！我以前都會心軟，依家我承認自己唔係鐵人。」問到有否欠下不少飛債？她自言攞到應得的門票數量，又笑言朋友不多，最開心是為歌迷會的粉絲爭取到好位置。

對於今次賣票方法改變，能否成功杜絕黃牛黨？祖兒指跟相關部門合作得很好：「網上程序多咗好多，防止機械程式同電子黃牛，啲飛賣得平均啲，而攞出嚟公開售賣嘅門票都多過往年，希望入到場嘅朋友係真係鍾意我！如果只係識我一首半首歌，咁就讓畀其他人，唔好浪費。（咁咪會有人炒飛？）用真心同良心去對待呢件事。」

場場爆滿，祖兒最開心幫歌迷會粉絲爭取好位。

祖兒剛在記者會舉杯預祝大賣，果然一日就賣晒飛。