蕭潤邦整蠱阿媽 巨籠包加料四合一
今年母親節，蕭潤邦（Oscar）媽咪除多了個新抱仔江若琳（Elanne）外，Oscar的食肆又再開分店，認真安慰又開心。
Oscar更窩心地親自炮製「加料小籠包」：「我阿媽好有型嘛，我梗係送啲型啲嘅嘢畀佢，平時4粒小籠包，我阿媽梗係要整個4合1『巨籠包』。」蕭媽媽忍不住邊食邊問：「係咪食得(口架)？係咪整蠱我？」Oscar說：「冇玩你o架！」原來餡中藏有巨型綠晶戒指，即時氹得蕭媽媽「四萬咁口」。Oscar笑言雖不算貴寶：「但就可以襯番阿媽戴出去威吓。」蕭媽媽冧爆收貨：「物輕情意重呀！」
江若琳爆奶奶「喊點低」
Elanne指老公經常整蠱奶奶，搞喊對方，Oscar直認：「即係屋企熄晒燈，突然彈出嚟嚇佢囉。不過，我阿媽好玩得，無論嚇佢100次，佢都話『人嚇人，嚇死人o架』！」蕭媽媽易笑更易喊，被兩人形容為「喊點好低」，提到兒子事業有成，她又不禁眼濕濕。
Elanne大讚奶奶對她視如己出，早前入院做小手術，奶奶來到病房竟擔心到喊，Oscar笑言：「唔知以為絕症，阿媽真係好多情感。」Elanne自言有兩家人錫幸福滿瀉，閒時亦會跟奶奶入廚，誓將蕭家廚藝承傳下去。