劉美娟欣然面對攬攬傳愛盼奇迹

歌手張崇德與劉美娟結婚18年，育有一對仔女，囝囝張日希12歲，囡囡張日晴11歲，仔女均患有罕見選擇性失語症（面對陌生環境及人群會自我封閉拒溝通），為照顧他們，劉美娟不惜全面停工。

資優生被忽略

她指當初不知囝囝患有失語症，只知他資優、求知欲強，而且偏愛爸爸，故教育他時相當吃力，令她情緒一度崩潰：「佢好黐爹哋，試過爹哋要到中東讀博士學位，兩星期唔喺香港，佢完全係相思病，唔食嘢，情緒好差爆喊，令我好無助。（點解咁黐？）我覺得係因為妹妹出世，我將專注力分散咗畀妹妹，佢心入面感覺被離棄，所以對住我會刻意失控，令我有啲崩潰。初時都會將佢交畀爹哋湊，但後來覺得唔應該咁，所以主動出擊搵原因。有一日我攬住佢，同佢講對唔住：『媽咪一定有啲嘢做錯咗，傷害咗你，有咩唔啱你話我知。』佢聽完爆喊，之後我哋就慢慢解開咗個結。」

講不出聲難自控

面對兩個小朋友同患失語症，夫妻倆沒有埋怨，反而欣然接受上天的安排，劉美娟說：「佢哋唔係唔講得嘢，只係喺學校唔講嘢，我哋發現囡囡有呢個病先，但佢四年就解決咗呢個問題。有咗阿女開聲嘅先例，所以唔擔心阿仔。講嘢其實對佢嚟講好難，阿女同我講過：『哥哥唔係唔講，係我哋講唔到，我哋喉嚨頂住，出唔到聲。』我好多謝佢提醒咗我。」

張崇德與劉美娟用愛包圍子女，但不代表溺愛，張崇德說：「我其實係好嚴嘅人，好多時因為危險，我會好狠咁鬧，但之後會攬番呵番佢哋，所以就算鬧完，佢哋依然咁愛你，因為出發點係愛，唔係無理取鬧。」仔仔現時表現獨立，夫妻倆感到欣慰，他說：「佢喺屋企好自動自覺做所有嘢，只係喺學校仲未得。（擔心將來？）唔擔心，點知未來會點，明日嘅嘢未諗。」