狂迷纏身 張敬軒叫Kenny報警：恐怖過我！
「獎王」張敬軒昨日舉行記者會，獲頒兩張金唱片，得獎唱片分別是《Dahlia II》及《Senses Inherited》，並宣布打破多項紀錄，成績驕人。英皇娛樂集團行政總裁許佩斯特意送上光酥餅作神秘禮物，好讓軒仔兌現早前跟Fans許下隨碟附送光酥餅的惡搞承諾。軒仔宣布自掏腰包印製全球限量5隻的《Senses Inherited》水晶唱片公開拍賣，不扣除成本全數捐贈到慈善機構。據他所知一張水晶唱片成本逾萬元：「做慈善個起拍點會低啲，希望有個好價錢。」
有證據告恐嚇
談到好友關智斌（Kenny）遭女Fans硬闖屋苑，曾收Fans頭髮作禮物的軒仔坦言，早已聽對方及同事提過：「仲恐怖過我！我嗰啲都係送禮，但佢係撳佢鐘仔，好得人驚！聽番嚟係個Fans撳晒全幢樓嘅鐘。我有建議報警，同事都Cap晒圖放上網。」又透露已有證據控告該名Fans恐嚇：「佢話唔見佢就會食藥！我覺得同歌迷建立一個良好嘅互動係好，但唔好過分地將藝人生活透過想像力融入自己世界，其實都好骨痹，出街都唔知有冇人望住自己！以我所知呢件事已經發生過好幾次，仲曾經喺Kenny屋企樓下等7、8個鐘，但如果佢冇實際傷害，報警都拉唔到佢，只係就咁備案，呢啲係做藝人無奈嘅地方。」
另外，日前他化身「火龍果」惡搞好友容祖兒新歌MV，他笑稱已被對方懲罰：「佢叫我妖孽，仲當面搣咗我幾下。（佢話你犧牲大，冇晒底線。）唔緊要，都係我嚟。」問到他可會以「火龍果」造型擔任祖兒個唱嘉賓？他笑言：「點都好，都係想帶歡樂畀大家。」