花蓮上山下海 梁嘉琪划獨木舟睇日出
藝人梁嘉琪早前到花蓮拍攝旅遊特輯，上山又下海，接受體能大挑戰的她笑言累透，回港要休息「充電」：「今次幫台灣一個旅遊網站拍攝，喺森林揸越野車，深入森林睇風景！因為我係初學，所以揀啲平嘅路，樹景係好多人打卡嘅景點。另一日就玩獨木舟睇日出，凌晨三點半出發，真係好正！我喺香港都有玩獨木舟，但係兩回事，覺得幾Amazing，大自然真係好靚！」
她表示此行最期待的是到國家公園行古道，親身體會原住民在懸崖開闢的歷史故事：「故事係有血有汗有淚，甚至付出好多條性命而成，依家只係開咗部分。一直好想見到高懸崖呢個畫面，不過嗰幾日花蓮不斷落雨，導遊基於安全理由，最後取消咗。」她坦言日後若有機會，一定會重遊舊地。
