林凱恩選港姐圓媽咪夢想
藝人林凱恩自幼父母離異，媽媽一直身兼父職，無微不至照顧子女。母親節快將來臨，林凱恩特別炮製玫瑰花蛋糕冧媽媽。她坦言與媽媽似朋友多過母女，並自爆參選港姐是為了圓母親心願。
於無綫處境劇《愛．回家之開心速遞》飾演乖學生「譚育英」的林凱恩（Iris），現實中同樣是孝順女，唯一不同是她中一時父母離婚，自此媽媽身兼父職，含辛茹苦湊大子女。
齊戴四方帽
母親節快將來臨，Iris整玫瑰花Cup Cake送給媽媽，以小小心意孝順對方。她坦言兩母女沒有秘密，最開心是早年一齊着畢業袍影全家福：「媽咪因為要養家，所以冇讀大學，之後佢有機會讀書，咁啱我讀緊大學，大家差唔多時間畢業。好記得當時我哋一齊溫書，媽咪『釣魚』時我會鞭策佢，叫佢努力，最後一齊戴四方帽畢業。」又自爆2015年參選港姐，是代母親完成夢想：「我覺得媽咪好靚女，但佢細個為生計冇呢個機會，我覺得冇人知道媽咪嘅美麗，所以就代母選港姐。」
被猴子包圍扮唔驚
有個如此乖巧的女兒，林母坦言非常感恩，雖然既要工作又要照顧子女，被迫放棄再次拍拖的機會，但也是值得。她自爆有次與女兒行山，險些被猴子包圍：「嗰日去咗馬騮山，落山時已經天黑，有好多馬騮企正喺路中間，當時我驚過個女，但作為媽媽，都要撐住叫阿女唔使驚，最後冇事走得甩。」作為單親媽媽，她感激女兒陪伴走過艱難道路：「佢一路支持我，當你身邊好多人幫唔到你嘅時候，你望住身邊有個女陪你同行，其實係好大嘅鼓舞。」
場地：WHIZBO KIDS CAFE