張嘉兒B女臍帶纏頸三圈好險！

張嘉兒之前有「見紅」生B迹象，當時已過了預產期，B女卻「逾期居留」，不過B女原來已平安出世，重7磅多（3.25公斤），並取名Hannah，恭喜恭喜！昨日嘉兒特意請攝影師為他們影靚相，受訪時她說：「今次都係順產，但痛過上次好多，今胎雖然落產房後三個幾鐘就生咗，但真係好痛。生嗰時仲有啲驚險事發生，原來BB出嚟時，醫生話條臍帶箍住佢條頸三圈，好似戴咗三條頸巾仔咁，好在有驚無險，好快發現亦好快解決咗，最終都順產出世。（生嗰時有冇被嚇親？）當時我只係Focus喺用力生，同埋好痛，都係事後BB出咗嚟冇乜事，醫生先同我講，醫生好專業，可能佢有信心處理到，費事影響我。」

生兩胎都痛到嘔

嘉兒又指醫生表示類似情況並不常見，一年只遇到一次，她聽了之後猶有餘悸：「今次同上一胎一樣痛到嘔，我又冇用無痛分娩，超級痛！好搞笑，今胎我堅持喺屋企等耐啲先入醫院，點知去到醫院原來已經開到三度，老公都有入產房剪臍帶！」兩歲多的家姐Leora已見過妹妹，嘉兒說：「佢冇呷醋，見到BB時冇主動摸BB，但好搞笑咁話『BB好似我細個呀！Oh my gosh！（我的天）』」

張嘉兒母女平安，與老公溫馨抱着B女。	小Hannah出世好驚險呀！	張美妮送祝福之餘，快將「卸貨」的她亦開始緊張。

張美妮讚Hannah標致

張嘉兒已「卸貨」，她的最好姊妹張美妮將於6月初生B，美妮現時不停嚷着要吃雪糕，相當搞笑。說到預產期將至，美妮笑言：「係呀！見到嘉兒生第二胎都好開心，B女Hannah好靚、好標致，搞到我依家都好緊張。」

而好姊妹岑杏賢、莊思明均送上祝福，杏賢透露嘉兒產後已即時向她報喜，因忙於拍劇未有機會探望：「佢啱啱生完畀佢休息吓先，佢叫我哋下星期先去探佢同BB。（會送咩？）佢話乜都有，唔使送。」她又大讚B女很可愛，似足嘉兒的大女。至於莊思明則祝BB健康快樂，暫時未諗到送甚麼禮物，可能會封利是。