藝人黃心穎因偷食許志安事件全面停工，有份參演的劇集要重拍後才可播映，首當其衝的《法證先鋒IV》昨日落實由另一小花湯洛雯（靚湯）頂上。雖然被勒令開工前要搣甩10磅，但靚湯照單全收，更揚言不介意執二攤。

黃心穎被爆偷食後敗走洛杉磯，留下一堆「蘇州屎」給無綫及同事執手尾，最新鮮熱辣的可算是拍竣沒多久的劇集《法證先鋒IV》。早前該劇監製梅小青宣布黃心穎的角色將另覓他人頂替，保守估計重拍損失近千萬，最終落實由小花湯洛雯頂上。

靚湯昨日專誠返無綫與監製見面及試戲服，梅小青受訪時直言當角色是送給靚湯的生日禮物，又表示：「佢要應承我一樣嘢，就係要喺6月1號開工前減10磅，不過佢都好樂意。」

對於被指執二攤，靚湯受訪時表示絕不介意：「唔怕，公司畀機會自己乜都會做，有好嘅角色演已經係好事，自己唔會Concern（擔心）呢啲嘢。（最大壓力係要速減10磅？）冇壓力，我磅數成日都上上落落，時肥時瘦，要減肥都OK。依家諗住運動、按摩同飲食一齊嚟，第時仲可能可以出減肥書添！」又指現時最急切是要揣摩角色：「因為啱啱先知，所以要睇番以前啲《法證》劇再做功課。今次同黃浩然最多戲份，仲係第一次合作。」

至於有份參演《法》劇的鄭俊弘，昨日到電台宣傳新歌時透露下月將投入補拍戲份：「劇入面我同心穎係住同一間屋，都OK多對手戲。本身嗰段時間都係做緊歌，工作影響唔大，我又唔怕辛苦。」另外，有指黃心穎本月原定到巴塞隆拿出席活動，最後由高海寧及李佳芯（Ali）頂上，本報向身在當地的Ali求證，她說：「我唔知呀！我淨係去旅行咋！（唔係去拍嘢咩？）唔係啦！」高海寧則表示：「我唔知喎！所有工作都係公司同經理人幫我接洽，我只負責做好每一個工作。我同Ali一早約好咗拍完劇一齊去旅行，佢唔係去做嘢！」