譚嘉儀Check電話揭偷食渣男o趙完鬆！
歌手譚嘉儀昨日到電台宣傳新歌《怎麼你不找我》，她自爆歌曲內容是其親身經歷，講述發現男友有第三者後，對方就消失得無影無蹤，她說：「當年拍咗拖三、四個月，發現原來對方一直腳踏幾船，後來我喺個男仔嘅電話見到個女仔嘅對話。（你點揭發？）有一晚好夜，個女仔打電話嚟，我就叫個男仔開電話畀我睇。我當時好傷心，因為畀我揭發完個男仔就失咗蹤，完全搵唔到，佢竟然可以唔回頭，唔理你感受！」
寫歌唱舊愛
譚嘉儀坦言這是最深刻的一次，因為證據確鑿，以往都是估估吓。問是否常遇渣男？她說：「呢個比較深刻，我諗之前唔多。（對呢啲嘢好敏感？）經過呢件事之後敏感咗。（會唔會驚咗？）會小心啲，認識多啲先去開始一段感情。（見番對方會點？）都唔會有啲咩，可能同佢講隻歌係寫佢，叫佢留意吓！」問到感情生活，她透露現時未有拍拖，因未遇到合適對象，想先專注事業。
