陳家樂做一日男友剪刀手夾公仔冧女

男神陳家樂單身多時，為圓癡心女粉絲心願，在《我和星星有個約會》中做「一日男友」與Karmen拍拖，不惜投其所好踩入旺角，全程化身暖男手口並用，最後施展獨門「剪刀手」夾中公仔，成功氹得伊人開心。

當陳家樂知道有粉絲心願想做他的「女友」，即二話不說答應，更親自計劃一日Dating的路線圖，相當細心，由於目的地是拍拖貼地場——旺角，首站即醒目先帶「女友」Karmen去Shopping裝身，而Karmen甫見偶像即面紅耳赤，更自爆約會前一晚失眠，見二人一入店舖就盡顯默契，揀衫有商有量，很快完成「任務」買到心頭好，之後不停上演一幕幕「旺角卡門」。

手拖手控桿

潮流興玩夾公仔機，家樂亦希望於「女友」面前大騷Quali威威，故第二站就安排去「潮聖」，信心爆棚的他手持一張「紅衫魚」換銀仔，挑機前又帶Karmen繞場一周揀公仔，還自爆驚人外號「愛德華剪刀手」，但Karmen並冇被嚇窒︰「夾唔到有懲罰o架！」結果搞到他心情緊張，頻頻失手，夾極都唔中，只傳來陣陣淒厲慘叫聲。家樂玩了五、六次，戴埋眼鏡一樣「食白果」，就在「糧草」快用盡時，突然使出冧女秘招，主動說：「咁不如我哋用兩個人力量，好唔好？」原來是手拖手一齊揸實控制桿，Karmen又點會唔應承，最後花了75元完成「創舉」，成功夾到一隻粉紅色獨角獸，博得「女友」送上「愛的抱抱」。