馮盈盈由「頭」嚟過走蔭扮斯文

兩位選美冠軍宣布大變身!前港姐馮盈盈突然轉性話要變做斯文女,兼決定捨棄「馮齊蔭」造型求新鮮感;前華姐鄧佩儀自爆留長頭髮變回「女兒身」後,終於感受到有男仔追!

無綫綜藝節目《娛樂大家》前晚進行錄影,同場有汪明荃、陳凱琳、譚凱琪及余德丞等。「升呢」擔任客席主持的馮盈盈向來予人奔放性格,但今次揚言要收起本性「回歸」斯文:「睇吓遊戲戰況激唔激烈,會唔會令我原形畢露!」講到剛拍畢劇集《極道怪咖》,她表示可以不用再留齊蔭造型︰「經過3個半月,大家覺得齊蔭好悶,所以依家個新鮮感係撥番開試其他唔同造型。」

撇男友遊泰 承諾「派軍糧」

盈盈又透露已請大假賣甩男友「寶寶」,與閨蜜去泰國叉電休息,還承諾會影靚相「派軍糧」,問到是否包括泳衣照?她語帶保留表示要睇情況:「之前拍劇瘦咗好多,依家得番100磅。(帶定胸墊『僭建』?)瘦嘅話影出嚟會有骨感美!(點解唔同男友去?)佢要準備最後一個專科醫生考試,作為一個好女友要全力支持佢,就係出去玩!離開香港唔好阻住佢,佢不知幾感激我!」

嘉賓之一的鄧佩儀則緊張指有睇足節目「做功課」,現時留有一把中長秀髮的她笑言終於似番女仔,透露感覺到有男仔追求:「我啲服裝都會隨住髮型改變,依家私底下啲衫都好女仔,近排仲會戴耳環、手鏈。(多啲男仔追?)的確係,始終男仔鍾意長頭髮,同男仔頭嗰陣時感受到好大分別。」