Kary佗B四個月 讚老公幫得手
日前於網上公布懷第二胎的歌手吳雨霏（Kary），昨晚為宣布喜訊後首次現身公開活動，同場更有女星蔡卓妍（Sa）、蘇麗珊、林嘉欣、名媛上山詩鈉女兒Hilary等。穿平底鞋現身的Kary，她步履輕盈，微微見肚，狀態不錯，她透露已懷胎四個月：「最辛苦係頭兩個月，由朝到晚都作嘔、頭暈、腰痛，今胎係比上次辛苦啲，唔知係咪要湊BB又要佗BB嘅關係，第一胎輕鬆好多。」至於仔定女，她表示已知道，但想保持神秘暫不透露。問到大仔Asher知道自己做哥哥？她說：「佢十個月大，未知發生咩事，但我日日都有話畀佢聽。」
阿Sa未咁快收男友戒指
Kary被問到老公洪立熙有否送禮物作獎勵，她即大讚老公好好，照顧有加，更分擔湊仔工作：「佢不時幫手換片同餵奶，因為好少畀工人姐姐湊，想親力親為。（兩年抱兩係咪預計之中？）我同老公都係想快啲有（BB），不過今次有咗係一個驚喜。（如果第二胎係仔，會唔會再追女？）未諗到，但老公都想生三個，到時先算。」問到如今再有孕，是否代表復出無期？她說：「同公司嘅合約都有一段長時間，公司好好，冇畀任何壓力，仲叫我今日出活動一定要着平底鞋，大家關係好好。」
而阿Sa又再被催婚，問到會否想收男友戒指？她說：「唔係，未咁快，不過佢有送過首飾畀我，我覺得時間係最好嘅禮物，陪伴係最好，佢喺呢方面都做得好好。」