美國年度大型音樂節Coachella日前展開，大批樂迷包括名人紅星撐場，不過周六凌晨現場有流動淋浴車發生大爆炸釀成火警，火光熊熊的照片於社交網瘋傳，場面牙煙，嚇窒一眾樂迷！
Coachella音樂節於美國時間上周五在加州揭開序幕，現場有多個人氣單位演出，不過騷後仍然「火辣辣」就唔係好事！周六凌晨約二時，音樂節營區的流動淋浴車突然發生爆炸，有現場樂迷拍到爆炸後發生大火的情況，保安為安全起見高聲呼籲大家遠離現場，氣氛緊張，片段火速於網上傳開，有人留言表示身在現場，事發時聽到爆炸聲，懷疑煤氣爆炸，有人指：「當時爆炸距離我哋個營60呎左右……聲響嘈醒咗我哋，我哋即刻跑開！」據悉消防員約於二時半控制火勢，一架流動淋浴車被燒毀，另一架亦有損毀情況，幸而未接報有人受傷！
另一方面，音樂節首日除有積登史密夫（Jaden Smith）與Childish Gambino等歌手演出，還有自去年5月公開演出後休養多時的Selena Gomez「復出」，不過風頭仍不及首個於音樂節表演的韓國單位－－人氣女團BLACK PINK，打扮性感的四女唱跳一小時，13首Hit歌包括Jennie個人單曲《SOLO》及上周才剛發行大碟的新歌，其中泰國成員Lisa最搶Fo，騷後有大批外國網友狂於網上進行「人肉搜尋」：「嗰個劉海女係邊個？好火辣呀！」亦有網友留言：「我冇追開BLACK PINK，但嗰個劉海女真係好正！邊個可以話畀我聽佢係邊個，我要開始追佢！」有人更形容Lisa為天后Ariana Grande個妹及Rihanna個女，相當浮誇！
至於台下亦有不少星級粉絲撐音樂節，索模Alessandra Ambrosio、Kendall Jenner與Gigi Hadid等性感撐場，影帝里奧勒度狄卡比奧（Leonardo DiCaprio）、碧咸（David Beckham）兒子布魯克林（Brooklyn）亦有現身！