關心妍唔縱個女 自理守規矩
自2016年7月為老公楊長智誕下愛女楊榮心（心心）後，關心妍（Jade）便減少幕前工作，將全副心機放在女兒身上。開設音樂治療學院的她當然有向心心「私人授課」，難怪心心盡得媽媽真傳，不時於網上表演唱歌吸Like無數。
喊都唔即刻抱
雖然Jade愛錫心心，但絕對不會縱容，坦言由女兒出世開始已是「嚴陣以待」：「對BB真係要狠心！喺心心仲係BB嘅時候，我哋都忍住手唔會不停咁去抱佢，就算佢喊都唔會即刻抱，等佢慢慢習慣咗，就唔會不停咁喊。食嘢方面都係，細細個就唔畀佢食濃味嘅食物，全部都係清淡為主，所以佢依家覺得所有嘢都好好味，唔會揀飲擇食。」
此外，Jade非常注重女兒的品格培養，尤其是自理能力，即使家中有外傭姐姐，Jade仍堅持要心心「自己的事自己做」，不可以假手於人：「佢做到嘅嘢，盡量都要自己做番，例如食完飯之後個碗要攞番入去，洗手、抹手、執玩具等等都要自己做，好彩佢都好守規矩，完全掌握得到。」
育兒Tips
1.以身作則：平日主動與身邊人打招呼，囡囡「有樣學樣」，學習待人有禮。
2.無限耐性：小朋友學習要循序漸進，家長要有無限耐性，在她成功時要適當鼓勵。
3.親子活動：避免依賴電子產品，多與囡囡玩遊戲及聊天，訓練溝通及想像力。