陳嘉桓王敏奕玲瓏浮凸夠「胸」狠

金像獎紅地氈星光熠熠，郭富城、余文樂、方中信、鄭伊健和韓國女神宋慧喬等傾巢而出，眾女星趁機鬥性感，雖然楊千嬅、張靜初、周家怡及廖子妤等不約而同「V門大開」，可惜效果「平平無奇」，結果被「谷胸兵團」阿Sa、陳嘉桓及王敏奕揮低，司儀之一的郭奕芯亦大騷長腿吸睛。

謝安琪有前有後

鮮有亮相電影盛會的謝安琪，在紅地氈真空上陣低V兼露背現身，展露人妻性感魅力，她笑說：「好安全，黐晒膠紙。（有冇畀老公過目？）有，佢睇過仲好欣賞，不得不讚佢對時裝係好有品味。」而她在頒獎時換上另一襲V煞晚裝，更為艷麗。

王敏奕穿性感晚裝配襯閃耀的珠寶首飾，她坦言好緊張：「要黐好多膠紙，驚走光。（有冇問准男友曾國祥？）有Send張相畀佢囉！」

王敏奕低胸晚裝，展露高貴一面。	周家怡吊帶裙忽然晒事業線！	人妻楊千嬅中門大開，低調性感。

忽然「激凸」的阿Sa性感戰衣非常緊身，難怪她走紅氈時「硬晒軚」，問她會否抖唔到氣？她說：「麻麻哋啦！因為落住雨，裙腳濕咗愈行愈重。入場我會換條鬆身裙，等自己坐得舒服啲。」曾美慧孜起初先以密實裝束登場，叫人失望兼跌眼鏡，不過拍照時即脫下外套，大騷低胸晚裝，再配上閃爆BVLGARI鑽飾，被問到身上鑽飾總值？她說：「總之需要保鑣啦！我自己唔敢單獨去洗手間。第一次戴咁貴嘅珠寶，心情相當緊張。」

宋慧喬專程來港擔任嘉賓，夠晒畀面。	穿套裝的毛舜筠罕有性感。	身材單薄的廖子妤，一身裝扮「平平無奇」。

宋慧喬想拍愛情片

穿上鑲有金色水晶的黑色低胸晚裝亮相的惠英紅，因晚裝裙太長，令她行紅氈時一度失平衡，幸有驚無險。而毛舜筠也鮮有地性感上陣，帶着一枚超過二千萬元的Tiffany & Co.鑽戒，分外高貴。壓軸登場的韓星宋慧喬，受訪時透露已簽約澤東電影，未來望多拍香港電影：「知道香港有好多唔同種類嘅電影，我最想拍愛情片，期待所有新挑戰。」

真空上陣的謝安琪，換上性感晚裝上台頒獎。	擔任司儀的郭奕芯谷胸晒腿，戰鬥力十足。	張靜初穿粉色晚裝夠晒搶眼。