吳海昕跟蹤男仔返屋企
藝人吳海昕昨日擔任ViuTV新節目《晚吹：女學生·吹水班》嘉賓，大談讀書時代的少女心事。以校服Look亮相的她笑說：「我讀書時好乖，導演反而好鍾意搵我做飛女。」又自爆曾暗戀男同學，更跟蹤對方：「嗰陣15、16歲，唔夠膽同人講，所以跟住佢返屋企！亦因為鍾意運動型男仔，我加入咗籃球隊、排球隊，試過送水畀佢，但佢唔領情。」
吳海昕又笑言當年愛煲愛情劇，當正自己是女主角，腦子充滿無謂幻想，但又不懂打扮，甚少有追求者：「有男仔知道我鍾意玩RPG Game，一齊研究攻略，最後一齊咗大半年。最浪漫有個男仔喺跑道話，贏咗個獎牌就畀我保存一世，但最後都冇拍拖，保持好朋友關係，個獎牌我仲保存住。」