謝賢奪金像獎終身成就獎
在演藝界縱橫逾60年的謝賢，成為今屆金像獎的終身成就獎得主，他接受電話訪問時，坦言十分開心：「係大家畀面，霆鋒已經知，佢應該會同我慶祝，婷婷就唔喺香港。」十多歲入行的他，自言從未因辛苦而想過放棄：「導演畀我就做，唔會扭擰，亦唔會紅咗就恃寵生驕，呢個係我嘅職業，養大我，做好自己本分，交到貨畀人。可以做到咁多年，已經好滿足，係個天畀我食呢行飯。」
此外，他前晚出席劇集煞科宴時，笑言冇收片酬，只收利是：「我都冇拆，留番將來陪葬。（肯唔肯同霆鋒父子檔拍戲？）梗係唔制，畀佢搶晒我鏡！我乜都輸畀佢，依家係佢哋嘅世界。」問到有否見過前新抱張栢芝剛生的BB時，他坦言完全不知道：「都唔關我哋屋企事。」