莫文蔚熱情滿瀉停工一年陪老公

Karen自嘲年紀大，無意造人，只想享受二人世界。

莫文蔚（Karen）昨日獲法國殿堂級珠寶鐘錶品牌CHAUMET邀請，出席全新推出的腕錶Boléro系列發布酒會。Karen佩戴共值130萬的首飾及手錶現身，高貴優雅。同場還有兩位企業家林恬兒、呂志和孫女呂嘉瑩和眼鏡設計師朱熺暘，三人早前為品牌拍攝以「Successful Women， Redefined」為題的照片及短片，齊齊分享成功之道。

轉戰幕後做音樂劇

Karen透露收藏了不少腕錶，因工作辛苦時就會買錶獎勵自己，問到老公可有送贈名錶？她說：「佢會送戒指畀我，每年送一隻，由結婚開始佢新創嘅慣例，結婚八年到依家都收咗好多隻。（過咗七年之癢？）其實都冇癢過，同老公都仲好Sweet，之前忙工作成日丟低佢，依家見住佢仲好有拍拖嘅感覺同熱情，小別勝新婚。」更揚言將會休息一年陪老公，問到是否因對方詐型？她說：「佢冇，但我都要識做。（休息造人？）都幾十歲，唔造啦，好好享受二人世界。」並透露將會參與更多幕後工作及做音樂劇，問到男主角人選？她說：「我之前參加內地真人騷，識咗內地歌手華晨宇，同佢做咗好朋友，好欣賞佢嘅唱歌風格，佢把聲好入戲，都有同佢傾過，如果音樂劇成事，會預佢一份。」

Karen指老公Johannes年年送戒指，Sweet到暈。	呂嘉瑩為品牌拍攝短片，透露欣賞勇於追夢的人。	育有一子一女的林恬兒，不介意追多個。

林恬兒隨時追多個

而林恬兒自言是珠寶收藏家，當中最有價值是老公所送的求婚戒指。對於今次為品牌拍攝，能突出女企業家身份，她大感有意義。有一仔一女的她，透露家庭放首位：「我啲小朋友仲細，會以佢哋為先，工作第二。而我依家做緊嘅工作係有關環境組織、投資社會企業嘅項目，都算為下一代着想。」問到會否再生小朋友，她坦言不抗拒。