林峯狂操下身 澳門騷爆褲！

林峯相隔兩年再踏個唱舞台，宣布將於5月11日假澳門威尼斯人金光綜藝館舉行一場《HEART ATTACK林峯演唱會》。日前活動上重溫過往個唱的精彩片段，赤膊的他身材弗爆，六舊腹肌超吸睛，主辦單位英皇娛樂特意送上一籃番薯賀他收身成效更突出。林峯預告澳門騷將有新突破：「會着衫，但爆褲囉！老實講，練下身易過練上身，上身好多難收，練對腳推重嘢就得。」

有蕉食都偷笑

不過，最大挑戰是操肌和拍戲同步進行，他表示返內地趕拍《尋秦記》電影版時消耗體力，但收身要減食，加上本身體質易肥易瘦，更要格外小心飲食！他苦笑：「有蕉食已經唔錯，但蕉有糖分其實唔食得，都係食烚雞肉，希望內地有走地雞。」他指六舊腹肌有「記憶」，但自覺身材仍「差啲啲」，返內地會與健身教練同行，物色片場附近的健身中心加操。

其澳門個唱門票將於4月4日公開發售，然而日前有歌迷告知已有飛賣，令林峯擔心有歌迷受騙：「聽講網上已經有飛買，所以想提醒買飛嘅朋友要小心啲！」

落閘唔講女友

林峯之後會在內地再開三場個唱，明年亦有大Project：「目標係舉行大型巡唱，其實我冇開過廣東省以外地區嘅演唱會。舊年主力演戲作品，一路想以歌手身份喺舞台上報答Fans，直接帶個騷畀內地唔同城市嘅Fans睇，最想返家鄉廈門開騷！」問到女友張馨月可會去澳門捧場？他避談感情事：「都話咗以後唔講另一半嘅嘢，唔好要我咁『唚』啦！」

問到回歸無綫拍攝劇集《使徒行者3》之餘，會否唱埋主題曲？他說：「會合作唱主演嘅劇集主題曲，不過我同無綫合作係視乎劇本同角色有冇得發掘落去。」並強調只簽了古天樂一間經理人公司。