林峯踢拖圍毆打到瞓地

藝人林峯與周秀娜有份參演電影《P風暴》，林峯表示有不少動作戲，最難忘是獄中戲份，要與幾十人互毆：「當時大家都着拖鞋，好跣腳，最終打到瞓晒喺地。另外一場直升機戲，我要挾持周秀娜，好驚整親佢，所以箍佢時要就角度，總之自己出幾多力，最終都受番晒，搞到手臂青筋現。」首次加盟「風暴系列」的他被問會否繼續參演《G風暴》，他即說：「唔會喇，跟住要拍《尋秦記》同《使徒行者3》，冇晒時間，況且我角色已經有完美結局。（死咗？）入場睇就知。」他表示自己尚有一片三劇未推出：「嚟緊會勤力番啲！（收復失地？）睇緣分，演員好睇遇到嘅劇本同角色。（冇時間準備結婚？）唔想喺宣傳活動上講感情事。（會唔會結咗我哋唔知？）順其自然。（次次見到你都係宣傳活動，咪問唔到感情事？）唔好傾呢個話題咪得囉！」