湯怡27樓吊吊揈 怨導演「賣豬仔」
英皇藝人湯怡為新劇再次挑戰個人極限，被綁吊於27層樓高的商廈天台外，上半身凌空「吊吊揈」半個鐘，險象環生！她自爆試戲時已驚到爆喊、心跳加速兼腳軟，最後將「矛頭」指向導演，送她這份愚人節大禮！
無綫劇集《極道怪咖》昨日在荃灣商廈取景，講述湯怡被飾演社團大佬的徐榮綁架，最後被綁吊於27層樓高的天台外，等候王浩信前來營救。拍攝前，湯怡一臉緊張不停於天台踱步，大概已知「死期」將至！未幾，數名工作人員幫她穿上安全衣以及繫緊安全帶，並再三確認是否綁緊，可想而知有幾危險！
埋位時，湯怡戰戰兢兢行近天台邊緣，被吊出一刻不禁大叫幾聲，更高呼「好驚呀！」，搞到身後工作人員都替她抹一額汗！鏡頭前交足戲的她，事後受訪仍驚魂未定，自爆今次是第二度被吊：「第一次吊咗五分鐘，行埋去就已經腳軟、心跳勁快，雖然只係試戲，但都忍唔住喊咗出嚟！」又指導演拍攝前問過她有否畏高，試過於6、7層唐樓拍跳樓戲的她自覺冇有怕：「佢問十幾樓得唔得，都OK嘅，但前兩日先知係廿幾樓，嗰時導演仲話係背住出面，咁我都OK。點知一嚟到知廿幾樓之餘，仲係要望地下，好似準備要跳落去嘅感覺，離心力好大！（愚人節畀導演呃咗？）係喎！佢今日都好少同我講嘢。」又抵死笑指要向對方「問責」，為何與當初說法不一，但成功挑戰後覺得很開心。
淡定講對白 王浩信佩服
對於吊出去一刻的感受，湯怡坦言腦海想住家人：「大吉利是講，如果真係有咩意外點算？但相信TVB有幫我買重保險嘅。」有潔癖的她又指再打破個人極限，連續兩日開工冇沖涼：「冇落妝就瞓，但我只係瞓梳化，冇瞓落床。」
同場的王浩信大讚湯怡勇敢：「頭先見到佢好淡定，啲對白都講得好流暢，發揮得好自然，好佩服佢！我都有打拳嘅動作場面，同埋每日都同張振朗搞Gag，難度最高係要氹觀眾笑。」復活節將至，他透露計劃一家三口去旅行，提到太太陳自瑤早前表示想追多個，他笑說：「努力工作先。」