陳詩欣小強打不死誓返樂壇

陳詩欣2015年加盟樂壇，差不多兩年沒推出新歌，近年為無綫娛樂新聞台擔任主播，她說：「我都想試吓拍戲，成日都有試鏡，但機會總係擦身而過，可能自己未夠好，或者角色唔啱我，不過我唔會放棄！好似依家歌手難做，收入又唔穩定，見唔到前路。我就諗可以做乜，咪入無綫試吓，結果又有唔同機會，令大家認識我。我又會諗不如唱番歌，所以我咪話自己係『小強』。」

揀啱時機出新歌

她笑言今年將推出新歌：「首歌錄咗成年，MV都拍埋，不過要等一個好嘅時機，因為唔想嘥咗首歌。有時做歌手好無奈，出咗首歌好快畀人忘記，背後嘅努力就冇晒，所以要揀個啱時機先出。」她承認目前收入比做歌手時好：「依家穩定啲，主播係正職，加上出活動拍嘢，收入比以前多。但舊年出活動唱歌，喺後台我驚到胃痛，但上完台發覺自己仲唱得，又掛住舞台，尤其聽到粉絲同我一齊唱嘅時候，覺得好感動。」

欠缺自信被忽視

陳詩欣很開心無綫給予很多機會，除了做主播，又可以拍旅遊節目，之前又參與《美女廚房》：「主持工作令我轉數快咗、自信多咗，都有朋友話覺得我唔同咗。以前做新人冇乜自信，縮吓縮吓咁，覺得自己似隱形人，尤其同師姐Super Girls一齊，你知佢五個幾靚，好似睇我唔到！其實人哋唔係睇我唔到，係睇唔到我嘅自信，覺得呢個人可以忽視。入無綫後工作多咗，心態積極咗，相比以前都成熟咗，個人都開心咗。」

陳詩欣於旅遊節目大解放，成功引起網友留意。	放大圖片	陳詩欣擔心被外界忘記歌手身份。

場地：醉胡爐