鄧詠雪好奇睇交配遭鯊魚咬腳
藝人鄧詠雪（雪子）近期經常玩潛水推廣海洋保育，早前她到馬爾代夫作海底拍攝，跟魔鬼魚及護士鯊近距離接觸，一度被好奇的鯊魚咬腳蹼，驚險又難忘！
向來對水底世界情有獨鍾的鄧詠雪，近期頻頻接有關海洋保育及水底攝影工作，早前她以香港美人魚大使身份到馬爾代夫8日7夜，為亞洲潛水展拍攝作品，全程在船上度過，除了身穿泳衣大晒Fit到漏身形，亦有多次潛水拍攝機會。
與魔鬼魚同游
雪子直言心情超興奮，這次經歷令她更愛護海洋生物：「第一次喺海底影Fashion相，之前多數喺泳池，希望之後繼續有呢啲機會！潛水有好多奇趣經歷，呢度嘅海洋生物全部都好似大其他地方一倍咁，今次有同魔鬼魚一齊游水，又見到護士鯊交配，五隻雄性爭奪一隻雌性，咬嚟咬去，隻女仔身上有好多咬痕，都有啲血腥！（驚唔驚？）其實同護士鯊的確好近，但教練話佢哋唔會咬人，不過有一隻突然咬我個腳蹼，應該出於好奇，好快就游開咗。」
急救勤護膚
講到經常出海暴曬又要浸鹹水，雪子直言要額外護理皮膚：「每次落水前都做足防護措施，搽好防曬，但一定會留意成分會唔會傷害海洋，所以要小心選擇。我一上水就會用淡水沖身，同埋會勤力啲敷Mask。」問到揀男友是否也有投其所好識潛水？她表示絕對會加分：「最好要識潛水同水底攝影，絕對會加好多分！有共同興趣好重要，不過都知好難搵，起碼要欣賞同接受我呢個喜好。」
