傅嘉莉「女一」伸冤：稱號係公司畀

傅嘉莉繼早前被插博上位後，又再被傳耍大牌遭劇組排擠。

藝人黃智賢、傅嘉莉、陸浩明及無綫行政總裁李寶安等，昨出席「無綫電視與香港寬頻聯合新聞發布會」。傅嘉莉早前在社交網暗寸呂慧儀及黃文迪借她造新聞後，被指拍攝劇集《極道怪咖》時即變孤獨精，冇人敢埋身，她說：「自己都想澄清，其實套劇大家拍攝得好開心，冇合照唔代表關係唔好，咁我之後同大家影多啲合照，避免有誤會。」

否認戴私伙拍劇

除排擠傳聞外，亦有指她自封「女一」並戴私伙首飾拍劇，傅嘉莉急否認：「冇，所有首飾、手袋都係公司提供。至於『女一』稱號係公司畀，唔係人哋講。」她直言早前在社交網發文，只想再澄清事件，並非想搞是非，她無奈說：「當我聽到『搞是非』呢三個字，感覺好委屈！」對於有指她有私人司機接載，Kelly表示：「嗰個係我細佬嚟o架，佢得閒就會車我同屋企人周圍去，我同屋企人感情好好。」

黃智賢激光護膚

而黃智賢在會上透露與醫生朋友開設的醫學美容公司已經一年，問到他可有親身測試？他說：「我主要做激光保養皮膚，改善皮膚質素。（會唔會開分店？）做好呢間先，醫學美容競爭都幾大，最緊要係口碑好。」

黃智賢與友人開醫學美容公司，做生招牌。

無綫高層率領藝人出席發布會，預告新搞作。