吳業坤訪敍利亞難民自覺富有

歌手吳業坤、方皓玟、DJ急急子和鍾雪，早前遠赴約旦探訪來自敍利亞的難民，坤坤坦言看到難民流離失所、一夜間失去家園，非常感觸：「以前我成日諗嘢太多，例如諗演唱會點？得到啲乜嘢？見完佢哋之後，佢哋好簡單，只想生活、返屋企，但連返屋企咁簡單嘅事都要人幫！依家我唔會再諗要得到乜嘢，因為覺得自己好富有。」

他帶了很多小結他到當地播「音樂種子」，希望小孩因此熱愛音樂，他朝成為音樂家：「有個小朋友即刻彈畀我哋聽，有兩個女仔清唱阿拉伯民歌話想做歌手，雖然唔明歌詞，但聽得出感情。我都有唱《陽光點的歌》，佢哋未聽過廣東歌，但跟住唱one two three four，好得意。有一個細路add咗我社交網，跟住就有十幾個人add，話希望下次見。」

方皓玟受歡迎

坤坤自言吸納不少當地粉絲，但急急子卻爆他其實不受歡迎，反而小朋友見方皓玟即又攬又錫；鍾雪亦指方皓玟是難民營女神！方皓玟說：「當地習俗男女分得好開，女仔見到坤坤係忍住，見我就無介蒂。」鍾雪則指很多小孩在難民營出世，在慈善團體安排下才有機會上學。

吳業坤、方皓玟與小朋友打成一片。	急急子（左起）、方皓玟、鍾雪及吳業坤探訪難民，明白幸福非必然的道理。	方皓玟與靚仔小朋友合照留念。

方皓玟說：「我哋探訪咗一個有五個小孩嘅28歲媽媽，佢將鐵皮屋布置到色彩繽紛，想小朋友有家嘅感覺，但佢話『冇一個地方似屋企』，雖然家鄉戰亂，但最想都係返敍利亞。另外有個好靚仔嘅男仔，外表睇以為4歲，原來係7歲！因為缺乏營養。佢一星期上兩次堂，最怕善款不足連讀書機會都冇，就睇唔到將來。（你特別關心小孩？）我都係媽媽，心願好簡單，希望孩子快樂成長，有機會學習。香港有免費教育好幸福，唔使走難，要珍惜。」急急子亦感慨表示原來有工作好緊要。