遺傳「唔合作」個性 嘉穎望囝囝搣甩脾氣
藝人鄭嘉穎、林峯和譚耀文接受香港開電視訪問，分享拍攝新片《P風暴》的點滴。問到片中誰最Chok？嘉穎直指非林峯莫屬。而初為人父的他，透露兒子鄭承悅（Rafael）遺傳了自己的個性，令他哭笑不得：「個仔有我啲脾氣，總之佢周身郁唔合作，你叫佢去東佢就去西，希望佢搣甩呢樣嘢！」
向來多演形象正面角色的林峯，今次與阿譚同演反派，發現演反派樂趣更多。問到他與女友張馨月常被「野生捕獲」，卻甚少與傳媒分享感情事，他為此解畫：「一部電影作品有咁多台前幕後，用咗咁多個月辛苦去拍，然後透過我哋去宣傳時，如果將視線投放喺我嘅私人嘢，我覺得好唔專業！」他強調若將來成為人父，亦會很樂意跟大家分享家庭生活。