許廷鏗體驗「初夜」 胡鴻鈞 獲厚待「坐正」
入行10年的許廷鏗前晚在紅館舉行處男演唱會，他形容「初夜」感覺良好，騷上全女班做嘉賓輪流登場，但矚目程度不及坐在「主家席」的同性密友胡鴻鈞！許廷鏗講明不會將「初夜」獻給胡鴻鈞，但兩人卻在過萬觀眾見證下，隔住欄杆對唱兼自拍，毫不避忌！
許廷鏗（Alfred）首個個人紅館演唱會前晚揭幕，他以多個不同造型示人，原本穿黃色西裝的他演唱《體操》時，脫去外套露「兩臂」，更輕撫化身體操隊的女舞蹈員，動作火辣。之後他換上印有手繪圖畫的長褸，小時候志願做畫家的他指着其中一幅畫說：「呢一幅係我小六時嘅作品，全身有不同時候畫嘅畫。」Alfred的同性緋聞密友胡鴻鈞（Hubert）坐在第一行，見主角走到面前唱《護航》，他立即埋身，Alfred笑問：「你又點呀？」隨即向好友遞咪，Hubert不客氣唱了兩句，全場立即尖叫聲四起，Alfred更拿出手機玩自拍。
「你喺我心目中好緊要」
繼密友Hubert之後，他的三位知己林欣彤（Mag）、JW及鄭欣宜（Joyce）以格仔校服造型輪流登場，Alfred說：「喺呢個畢業禮咁重要嘅日子，我想請啲同我經歷高高低低嘅朋友。」Mag率先上台合唱《忍》，緊接是JW與他手拖手唱《矛盾一生》，一度感動哽咽，最後輪到欣宜出場，Alfred喊住說：「呢個嘉賓錫我多過自己，將所有嘢分享畀我。我開心佢開心，我唔開心佢比我更加嬲，如果你哋都好似我咁幸福遇到一個咁嘅人，你哋要好好捉住佢，記得大大聲講『你喺我心目中好緊要o架！』」欣宜哭成淚人，之後Alfred再與三女合唱《十年約會》及《青春頌》。
完騷後，Alfred暢談「初夜」體驗，笑說：「好好呀！」歌手以外同時是牙醫的他又表示由台底升上舞台，見到全場爆滿及觀眾亮起「牙仔燈」，真的很感動。提到胡鴻鈞坐正第一排中間位，似足主人家，他笑說：「唔好玩我啦，啲位又唔係我分配！（佢爭番嚟？）咁佢叻囉，我遞咪畀佢係諗住玩佢，點知佢識唱，係叻嘅。（唔搵佢做嘉賓？）下次啦。（你唔畀初夜佢？）初夜唔畀佢！點畀佢呀？」
腹肌未見得人
提到搞喊JW和欣宜，他說：「喺綵排時自己已經喊出嚟，因為心目中早已有個畫面，係希望同最好嘅朋友一齊分享喺紅館嘅畫面。」他指三女代表不同階段的好友，問到誰是「大婆」？他笑說：「我要講係Joyce，你照寫得嘞，Mag同JW一定明點解！」記者笑指許爸爸是「鐵粉」，幾乎每首歌都識唱，Alfred坦言爸爸很熟他的歌。問到操練多時卻未有騷肌？他說：「未練到六舊腹肌，依家得四舊，未夠好，等下一次Party先露啦！」