伍樂怡GPS搵炒栗子 童年味道返晒嚟！
在加拿大出世的藝人伍樂怡（Kelly），曾在香港短暫生活幾年，及後在母親陪同下返加國繼續升學，直至大學畢業後再返港定居，故一直記掛童年時在港留下最多回憶的地方，該處有溜冰場、朱古力店、玩具店、炒栗子等，每一處均有難忘的故事，如今重臨舊地，令她如同進入時光隧道般重返童年時代。
跟爸爸食炒栗子
4、5歲開始，Kelly受父親影響下愛上炒栗子，有別於其他小朋友喜歡食薯片，她說：「我口味同爸爸好似，佢鍾意嘅嘢我都鍾意，好鍾意栗子熱辣辣，仲要得冬天先有，喺加拿大生活就冇得食，每年只可以暑假返嚟，但又未有，所以都係近年冬天返香港先食番。」為找尋炒栗子小販檔，Kelly瘋狂得不斷上網搜查，即使找不到所在地也不放棄，不介意喪兜幾條街，(目及)實GPS細心找，笑指還可以一次過吃下一磅炒栗子當正餐。
溜冰場尋開心
從小憧憬在冰面上悠閒地溜冰的Kelly，在香港生活的短短幾年間，每次看到電視上有關溜冰的畫面也非常興奮，伍媽媽獲悉後，即帶她到又一城學溜冰：「媽咪成日話，等我返加拿大時帶我去湖邊溜冰，因為香港冇呢啲地方，所以心諗如果可以滑雪同溜冰就好。另一方面亦好憧憬外國冰天雪地嘅感覺，記得大約8、9歲就去學，當時仲未返加拿大，成日好想返去出生地，咁最接近嘅地方就係溜冰場嘞！」
她自誇有運動細胞及天分，當同學們還未企穩之際，她已能在冰面上自由地溜前溜後，後來返加國亦一嘗所願在湖邊溜冰。不過因「隔籬飯香」，亦同時令她掛念香港：「所以我又好期待暑假返嚟。」單憑學了一年的溜冰技術，足令她玩到大學，直至大學二年級才放下，問到可曾於溜冰場識男仔？她笑說：「係o架咩？都唔知呢樣嘢，平時都係同大班朋友去。（跌低有男仔扶！）跌低好瘀，我唔會有呢件事發生，即使冇溜冰幾年，但你要我依家落去玩都冇問題。」
扭買玩具險捱打
向來母愛氾濫的Kelly，很想有弟弟及妹妹，因為年長的她可以照顧他們，惟母親一直沒有再生，所以她只能透過湊BB公仔玩餵奶，她說：「我會同佢梳頭換衫，推車仔出街，會成日嚟玩具店幫佢買衫仔替換，有一次我喺度行行吓扭計，想買個奶樽畀公仔，媽咪話唔買，我好唔開心不停喊，後來夾硬畀媽咪拖出去，我唔知激到佢咩程度，佢除咗隻鞋想打我，但佢從來冇打過我，我當堂嚇到即刻收聲，自此之後我就知道扭計扭到咩位就會停，印象太深刻。」
朱古力店攞獎勵
Kelly與媽媽經常光顧商場內一間名牌朱古力店，她說：「以前溜冰之後會好攰，所以有時懶都會唔想上堂，媽咪為咗氹我，就帶我去呢間朱古力店試食，仲講到天上有地下無，但我淨係食焦糖脆脆長條嗰隻朱古力，隻味道到依家都記得，再食其他就覺得太普通，呢樣嘢係我細個嘅獎勵。」更指該朱古力提醒她要做乖小朋友，由於朱古力價格高，每次只能品嘗1、2塊，所以分外珍惜：「其實媽咪都問過我點解唔食其他味，雖然試過，但點都覺得冇呢隻咁好味，可能我食嘅係個回憶呢！」
拜山吔糖葱餅
Kelly從小對歷史有濃厚興趣，就連地道甜品小食都唔放過，她透露以往每年返港與父母拜山，都會途經一檔賣糖葱餅的攤檔，見父親買了一件，還吃得津津有味，她說：「細個未見過咁嘅食物，一張嘢包住唔知啲乜，後來爸爸解釋呢舊嘢嘅歷史，話我聽呢舊嘢叫糖葱餅，係香港地道甜品傳統，唔係度度有得賣，咁我又真係未喺其他地方見過，即係一年先食到一次，仲要係拜山先有得食，所以細個好想去拜山。」