軒仔被狂迷當老公
歌手張敬軒（軒仔）前晚自爆受狂迷騷擾，有女狂迷當正他是老公，傳逾二百個訊息問候他，又收過頭髮和成人玩具等另類禮物，笑言要進修大腦，令自己轉數變快。
前晚張敬軒出席「香港亞洲流行音樂節2019」，當日本歌手GACKT、韓團NCT 127等表演時，現場觀眾尖叫聲四起，打頭陣出場的軒仔有主場之利，面對強勁對手，即唱出幾首耳熟能詳的歌曲，他說：「多啲呢類活動幾好，可以同其他地方尤其日本同韓國歌手交流，我首新歌《YOU》都係由韓國音樂人介紹班底畀我識。（覺得同佢哋爭啲乜？）潮流觸覺，以前我哋帶領80年代嘅潮流，依家要奮起直追。」直言要自我增值，希望11月演唱會之前學跳舞，及跟美國教練學形體訓練。
收成人玩具
他還笑言要增值腦袋：「依家轉數慢啲都唔得，特別係網絡世界，佢哋不斷挑戰我嘅底線，會駁嘴、鬧，所以有時block佢哋一兩日，困佢哋入黑房。我好少開inbox，尋日開嚟睇，簡直大開眼界，有個女仔send咗二百幾個message畀我，講到好似同我一齊生活咁，例如叫我唔好執嗰個玻璃杯，𠝹到損晒！其實我從未見過佢，唔知佢係邊個，嗰啲事都係冇發生過。」感覺對方當他是老公，笑言睇完也覺得自己在經歷夫妻生活！
他又爆收過狂迷的成人玩具及頭髮，成為對方的性幻想對象：「話佢唔喺度嘅時候我就可以用（成人玩具），其實得到歌迷認可係開心，但都要有限度，我哋只係佢哋精神上嘅支持，現實生活中，佢哋應該喺生活搵到自己嘅價值。」
同場的樂隊Nowhere Boys代表香港參賽並進入「亞洲超級新星大獎」三強，他們坦言心情興奮，當正是自己音樂會，更望今年開騷。