余香凝暗寸吳卓羲老？黃宗澤代出頭：冇家教！
藝人吳卓羲（Ron）與余香凝（Jennifer）合作拍攝網劇，兩人昨日出席活動，Jennifer稱細細個睇對方演出的劇集，如今拍咀戲感覺夢幻。Ron笑言最忌講呢啲，並拉「三哥」苗僑偉落水：「我都唔敢咁同三哥講啦！」好兄弟黃宗澤則開玩笑指Jennifer「冇家教」！
藝人吳卓羲、蔡潔、余香凝、馬德鐘、苗僑偉及古天樂等，昨日聯同邵氏兄弟執行董事樂易玲現身「邵氏兄弟影視項目發布會」，席上除了播出旗下電影《使徒行者諜影行動》及網劇《飛虎之雷霆極戰》宣傳片外，又宣布開拍《廉政狙擊》、《風塵三俠》和《飛虎III》三部網劇。邵氏另與曾志偉、鄭丹瑞、王晶及王祖藍的公司有合作計劃，並跟合作夥伴簽約成立演藝訓練網絡互動平台「Show 8」。
同蔡潔爭仔
《飛》的片段中見Jennifer與Ron有接吻鏡頭，她笑言劇中與蔡潔爭仔，更強吻Ron：「我拍戲好少有咀嘴鏡頭，而且佢仲係前輩。（覺得尷尬？）唔會，不過覺得好夢幻，我細個睇佢做《學警雄心》，依家竟然有Kiss戲！」蔡潔表示同樣與Ron有接吻場面，更是拍戲以來最浪漫一次。
「怕佢唔識三哥！」
對於Jennifer指自小看其演出，年長14歲的Ron笑說：「唔係呀？我哋差不多年紀，最忌講呢啲！三哥做嗰套《天師執位》，我都係話最近睇，唔會講係細細個睇！唔知佢敢唔敢咁同三哥講？我怕佢話唔識三哥！」身旁的黃宗澤即打趣指她冇家教：「最衰係我哋之前冇教過佢！」
至於邵氏合約藝人馬德鐘在《使》片飾演警務處長，直言是夢寐以求的角色。而樂易玲在台上套用郭富城的一句話，道盡對香港電影的熱誠：「有人問郭富城點解接《麥路人》，佢話因為係香港電影，令我好感動同肅然起敬。」