郭富城驚患絕症 急睇醫生

「第43屆香港國際電影節」昨晚揭開序幕，郭富城、張家輝、任賢齊、陳家樂、余香凝及吳卓羲等現身紅地氈，場面星光熠熠。談到在新戲扮演露宿者，城城預告該片計劃參展：「其實拍完套戲好耐都抽離唔到，又擔心自己會患上角色嘅絕症，所以即刻去睇醫生，好彩冇事，真係驚餐飽！」

否認擺風水陣追仔

至於被爆家中轉擺「金龍多子陣」求子，他澄清：「一直喺屋企都有擺保平安嘅嘢，亂咁作。（以前唔係金色？）打風整爛咗，依家嗰個穩陣啲。其實生仔定女都咁開心，最緊要大女有個伴啫。（咁太太佗仔定女？）未Check呀。」

家輝與小齊主演的《沉默的証人》成開幕電影，家輝笑指心情特別高興：「我喺西班牙拍緊戲，為咗今日宣傳特登飛返嚟一日。（冇時間陪屋企人？）尋晚有食飯嘅，冇詐型囉。」

小齊大爆與家輝在新戲中動作連場周身傷。	陳家樂	余香凝（圖）與舊愛陳家樂同場零尷尬。

小齊受傷隱瞞阿媽

小齊則自爆拍攝該片一場撞門戲時，令腿部肌肉受傷：「用咗兩個月拐杖，又唔敢講畀媽咪知。（唔係太太係媽咪？）因為我話畀阿媽知，自己去拍文藝片。」

此外，家輝取笑同場的陳家樂緋聞：「你依家幾條女梗邪惡！」昨晚家樂與舊愛余香凝同場，二人齊聲表示不尷尬。當被問到與陳瀅同車，家樂即答：「好耐之前嘞，當時同佢合作拍緊劇，收工車埋佢啫，冇乜嘢要回應。」余香凝則透露近日因忙於準備金像獎的唱歌表演，搞到失眠，每兩小時醒一次。