「悟空」浩民「沙僧」麥包斟再西遊 玩集體回憶

昨日「孫悟空」陳浩民及「沙僧」麥包出席活動,麥包指浩民現時是「網大王子」,兩人都希望可再演出《西遊記》,勾起大家集體回憶。

藝人陳浩民、麥包、鄭世豪及曾樂彤昨日到將軍澳出席《樂善「糖」甜心活動2019》,浩民更帶同一對仔女出席做善事。難得「孫悟空」浩民及「沙僧」麥包重逢,他們表示平日也有聯絡,經常商討再合作的可能性,但公事夾唔到,善事及聚會就OK。麥包指浩民現在是「網大王子」,拍下很多大受歡迎的網絡大電影,希望今年有機會合作!問到會拍甚麼題材?浩民表示之前已翻拍《西遊記》,可惜麥包未能抽空再演沙僧,而年中將會拍下一集,希望兩師弟可重逢!

曾樂彤助學搬搬抬抬

問麥包頻搞生意會否很難抽身?他說:「生意可以交畀人,我係以演員自居。(怕唔怕演沙僧好辛苦?)大師兄黐晒毛都唔驚,佢唔演人嘅角色就最好,全部都係神仙!」浩民笑說:「我啲嘢唔係人拍。」問會否找「豬八戒」黎耀祥?麥包笑說:「佢貴呀!試吓囉!係大家都鍾意嘅回憶。」而麥包的餐廳前日新開張,邀請了一班朋友出席,浩民也帶同家人撐場,他笑說:「我哋『還俗』之後,大家生咗成竇仔女!」

同場的「甜心大使」曾樂彤親自義賣糖果,指之前有賣旗及探訪經驗:「最難忘去廣西助學,幫班小朋友煮嘢食同搬床褥!(你煮嘢食得唔得?)唔係地獄囉!成日煮畀阿媽食!最叻白烚,我就鍾意食火腿蛋飯,由細食到大。(頹飯喎!)係呀!但好味。」