陳嘉桓怨Bosco太忙 獨遊台灣識男仔

藝人陳嘉桓早前被爆與緋聞男友黃宗澤(Bosco)同遊馬來西亞,昨日她出席活動時,呻對方忙到沒有時間見,只能自己一個人周圍去,故打算下次撇甩Bosco獨自遊台灣,免得阻礙她識男仔。

陳嘉桓(Rose)昨日現身大埔超級城出席《2019台灣小鎮漫遊——人氣田園節》活動,經常去台灣旅行的她笑言曾考慮認識台灣男友,更諗過嫁到當地:「我識好多台灣朋友,但又未試過真係發展。」對於早前被指與緋聞男友Bosco到馬來西亞旅行,問到下次會否一同遊台灣?她說:「關咩事呀?上次咁啱好多人都喺嗰邊,有周柏豪、蔚雨芯。大家有聯絡問吓有咩好嘢食,我哋都有約出嚟見面。佢(Bosco)有介紹餐廳畀我、幫我Book位,但佢好忙要不停開會,所以我都係自己周圍去玩。」

Amanda S.唔想同居

Rose直言不打算與Bosco一起到台灣玩:「我自己去啦,我要去識男仔!(佢會嬲?)唔會啦,我同佢都冇關係。(唔係拍咗拖好耐o架?)有啲咁嘅事咩?要嬲都應該係我細佬嬲,嬲我唔帶佢去玩。(會唔會考慮Speed Dating?)好似好恐怖,太過刻意,可能過多幾年先會試。」

同場的名模Amanda S.表示與外籍男友分隔兩地,每日透過電話解相思。問到會否對男友構成壓力?她笑言不是Check對方,而是向他表示掛念之情。問到會否同居,她表示崇尚自由,沒有這個打算。