阿Sa三度衝擊金像影后 男友發功爭開齋
蔡卓妍第三度問鼎金像影后，早前接受專訪時坦言每次提名對她都非常重要，因為就像「及時雨」，令她有勇氣走出困惑。愛情事業兩得意，男友石恆聰最近在網上「發功」，於電影網站為她投票造勢！
《第38屆香港電影金像獎》將於4月14日舉行，今年影后之爭相當激烈，蔡卓妍（阿Sa）憑英皇電影《非分熟女》飾演有性障礙的失婚女子而成功入圍，繼《戲王之王》及《雛妓》後第三次衝擊影后。三度入圍背後，阿Sa原來曾有事業迷惘期，但每次提名都助她走出迷思：「一個演員唔會為咗攞獎而拍戲，只會想做好角色，但有時真係需要一啲鼓勵，入圍確實係好大嘅鼓舞！演員到咗某個階段，好容易出現迷惘，需要有啲聲音令自己走出去，好慶幸每當我去到樽頸位，就會出現一個提名，令到我有勇氣拍更多唔同類型嘅嘢。」
「拍呢套戲有使命感」
面對好戲之人張靜初、來勢洶洶的曾美慧孜、菲律賓演員Crisel Consunji以及越級挑戰的余香凝，阿Sa笑言個個都有機會，問到今次影后之爭有何優勝之處？她說：「對比我以前嘅入圍，呢套戲更加有使命感！因為我哋申請香港電影發展基金嚟拍，你攞咗錢，當然好希望做到成績，有個交代！呢個基金好緊要，幫到好多新導演，亦令唔少新人加入。」
阿Sa問鼎影后，男友石恆聰當然高興，問對方有否做些窩心事打氣？她甜笑說：「有啊！佢喺網上見到啲電影網站有投票，就會即刻去投我一票，仲問番我係咪咁投，驚投唔到，好搞笑！（有冇下廚煮嘢畀你食？）平時都係佢煮，我太忙喇！」若然奪得影后、對方又求婚，會否答應？阿Sa笑說：「呢兩件事都係我自己控制唔到嘅，唔答囉！」
