鄧達智患前列腺癌 八小時手術割瘤
曾患乙結腸癌二期的時裝設計師鄧達智，近日再證實患上前列腺癌二期，並已於本月初成功割除腫瘤。兩度走出鬼門關的他樂觀面對，更揚言一塊尿片都冇用！
鄧達智（William）於2014年患上乙結腸癌二期，最終戰勝癌魔，想不到事隔四年多，癌魔再次臨門！William透露去年8月已得悉再患癌，但一直沒向伴侶陳梓欣（Clement）坦白，現已出院回家休息的他說：「自從腸癌後，家庭醫生每年都會幫我做幾次身體檢查，一直冇問題。有日我睇咗溫拿關於男性驗身嘅廣告，特別去驗吓前列腺，結果癌指數係9，正常應該係4.5。當時心情好忐忑，有三個月刻意擺埋一邊唔理，之後再驗指數跌到6，都依然超出正常，決定做手術。我一直冇同Clement講，因為唔鍾意同人商量，但決定做手術終於都要講，唔想延遲手頭上嘅工作。醫生照過冇擴散，話等得，唔算太危急，所以三月先動手術。」
微創開刀
雖然兩度患癌，但他態度樂觀，解釋稱是兩個不同部位患病，並非癌症復發：「其實我好好彩，有75%男人都會面對呢個問題，25%係死咗都唔知啫！如果超過70歲先發病，做手術都未必復原到，我覺得自己唔會因為呢個病而死，只會同呢個病一齊死。」他續指此症患者一般有尿頻和「滴滴尿」的情形，幸而他沒有這些病徵，出院兩天 已行得走得：「手術係微創，用機械人手臂開刀，傷口細，流血唔多，所以做咗八個鐘，住咗九日醫院，機械人手臂開刀亦可減低影響到性能力嘅部位。（性能力有冇受影響？）一般都要過一段時間先有番，但我條尿喉都未掹，就已經感覺到『佢（性能力）』返咗嚟！手術後，醫生話有段時間會失禁，我都買定紙尿片，但都冇事，一張尿片都冇用過。」
馬詩慧嚇一跳
記者昨日就此事訪問William的模特兒好友馬詩慧，她得悉對方患癌大感愕然：「人冇事就得，同埋佢話嗰樣嘢（性能力）冇影響最緊要！我哋嘅關心在心中，會傳短訊慰問佢。」