張兆輝賣樓勁賺千萬

56歲的張兆輝近年中港兩邊走，早前拍攝內地劇集《北上廣不相信眼淚》令人氣急升，拍劇登台賺到盆滿缽滿，絕對是「吸金王」。

投資有道的他，近日以1,700萬賣出馬鞍山翠擁華庭一個複式連平台特色戶，實用面積1,105方呎，呎價為15,385元。據知他於2005年以654萬買入，持貨14年，今次沽出物業帳面賺1,046萬。本報致電張兆輝，他直言剛剛成交，認為現時是適合時機：「依家都係一個好價，地產經紀同我講，依家個樓市穩定咗，遲啲就會跌，所以要留番啲資金等樓市跌咗再入市。」

有瓦遮頭好重要

他自言向來有買磚頭投資，皆因最保值：「因為爸爸喺我細細個就同我講『有瓦遮頭』係好重要，所以好細個已明白呢個道理，同埋香港人買樓嘅問題向來好令人關注，大家都係希望『有瓦遮頭』。」又指在訓練班時已留意樓價：「當年買一個豪宅只需要70幾萬，呢幾十年嚟見樓市不斷升到依家天價，連元朗嘅單位都要萬幾蚊呎，以香港嘅地理因素，買樓就係最好嘅投資。」

愛的宣言冧老婆

成功沽出物業，適逢結婚22周年，張兆輝在網上分享與太太的卡通合成圖，並寫下深情說話：「當年的今天謝謝你給我一個丈夫的身份，我認識你時你21歲，謝謝你陪伴了我那麼多年，結婚22周年快樂。我的張太太！」又自詡向來浪漫：「平時都會同老婆講情深說話，加上依家啲仔女去咗外國讀書，我哋兩個人相處時間更多，更加要氹吓老婆。」