陳瀅抑鬱邊緣喊到攰謝絕朋友

陳瀅今次在《福》劇中扮演外表西化、被余德丞傾慕的藝術家，其亮麗外表卻包藏着傷痕纍纍的心，可謂一次演技大挑戰！為徹底投入角色，她「懲罰」自己過了兩個月灰暗人生：「呢個角色好似洋葱，要一層一層咁拆開佢心底嘅秘密，佢長期喺深淵見唔到光明，所以絕對係個悲劇。拍攝期間我謝絕晒所有私人生活，因為知道進入咗（角色）就好Dark、唔可以同朋友見面，最終我竟然成功捱過咗兩個月，即刻同自己講可以笑番嘞！」

入行以嚟最大難關

當收到劇本，得悉自己的重頭戲要一天內完成，陳瀅坦言起初擔心應付不來：「重頭戲全部發生喺我屋企內，點知最終係趕收工前嘅一日先搭完晒成個景，仲要交代我最唔開心嘅嘢全部都喺嗰度發生。基本上嗰日每場戲我都要喊，由飲泣、流淚至嚎哭，拍完一場已經好攰，點知我又真係完成到，過咗呢個難關，完成咗入行以嚟最大嘅挑戰！」

「留低係咪值得？」

問到兩個月拍攝期是否情緒波動得大？她坦言：「有唔開心，覺得好寂寞同孤單，話晒我一個女仔喺香港咋喎！平時我好依賴身邊嘅朋友去幫我平衡生活，所以今次感覺真係唔係咁好！煞科即刻成個人鬆晒。（咁耐以嚟好辛苦？）有時都會質疑自己。呢行有時好忙、有時又未必有嘢做，冇嘢做就會諗，我咁樣留低係咪值得呢？冇屋企人喺身邊支持，又錯過咗好多同佢哋嘅回憶，例如我家姐最近有咗BB，咁重要嘅時刻我都冇得親歷其中，但做演員有好大嘅滿足感，都算平衡到我心態。（有諗過放棄？）有段時間唔係好多嘢做，加上我份人又性急，認真考慮過係咪應該返加拿大搵份正常工，好好拍拖同結婚生仔。」

場地：漁獲浜燒（尖沙咀）

服裝：Stevie May