盧惠光20歲大仔泰片擔正睇得唔打得
曾經是80年代拳王的動作演員盧惠光，其20歲長子盧俊諺（Jacky）卻未有「繼承」父業，不演動作戲，反而拍愛情片，最近參演一部泰國青春校園電影，只與小女生談談情，怎料一個孭女友行樓梯鏡頭，竟令Jacky扭傷腰背，更要父親帶他睇跌打。
59歲的盧惠光有子初長成，他於1998年與亞姐黎淑賢所生的長子盧俊諺，如今已20歲，3年前到英國留學，憑高大身形及俊朗外表，被電影老闆看中，於一部泰國校園電影《The One You Love》演男主角。雖然有個打得的父親，但Jacky的演出卻是文質彬彬的學生王子，片中與女生Stephanie合演學生情侶。此片在泰國、香港及英國三地取景，劇組日前在香港中環蘇豪區拍攝，一場小情侶孭住行樓梯的浪漫鏡頭，過程看似輕鬆，但幾Take後，Jacky卻扭傷腰背，見他手撐後腰，狀甚痛苦，他說：「因為之前踢波傷過，呢個係舊患，今次再傷，都要叫阿爸帶我去睇跌打！」
唔使繼承衣鉢
此片純如蒸餾水，沒有激情及親吻場面，對全無演戲經驗的Jacky而言，總算駕馭得來，但身為拳王兒子，不少人對他都有期望，但原來他沒有「功夫底」，亦從未想過像父親一樣，在大銀幕上拳打腳踢，不過，Jacky高大有型，要是在娛圈發展，也不愁出路。至於盧惠光亦沒有給予壓力要求兒子繼承衣鉢，他說：「開戲嘅朋友識咗好耐，佢睇住Jacky長大，又幫佢安排英國讀書，今次佢話開戲，想搵我個仔演出，我見角色係男主角，咪畀佢試吓拍戲係點囉！當係還個朋友嘅人情債啦，當然係讀書為先！（唔係演你擅長嘅功夫片會失望？）唔會，佢拍學生片仲好啦！做番自己！其實我都唔係好想佢入行！」
怕辛苦揀文戲
懂事的Jacky雖然有機會拍戲入娛樂圈，但他仍以完成學業為大前提，今次只是請假兩星期拍戲，他受訪時稱是玩票性質：「今次都係玩吓啫！（緊張？）點都係第一次，會有啲緊張，講英文對白都有啲難度！（對拍戲了解？）細個成日跟爸爸去片場睇拍戲，大概知係點！（但你唔拍功夫片？）我鍾意睇功夫片，細個亦有學過吓武術。（兩樣揀鍾意邊樣？）拍文戲好啲，冇咁辛苦！」
剛過20歲生日的Jacky依然怕醜，對自己的樣貌亦未有很大信心，問今次當男主角，可覺是樣貌取勝？他笑言：「自己讚自己唔係咁好。（畀自己幾多分？）6、70分啦！（欠啲咩？）爭啲成熟感啦！（父母贊成入行？）佢哋都有教我，喺演藝圈，最重要係心態正面，一定有人鍾意或有人唔鍾意，唔使理人點睇！」